Ákveðið hefur verið að Sunnan3 leggi til fjármagn og faglega ráðgjöf í samstarfsverkefni grunnskólanna þriggja í Árborg um rafræna skráningu skólamáltiða á netinu. Um er að ræða aukna þjónustu við forleldra og nemendur á grunnskólastigi í framhaldi af því að farið var að bjóða upp á heitan mat í hádeginu í grunnskólunum í Árborg. Samið hefur verið við Vef hf um þróun á skráningarkerfi fyrir internetið þar sem foreldrar geta skráð börn sín í mat og morgunhressingu til styttri eða lengri tíma. Vonast er til að af þessu hljótist nokkuð hagræði fyrir nemendur, foreldra og starfsfólk skólanna, því þar með þarf ekki lengur að senda nemendur með miða heim og handvinna svo skráningunna í skólanum. Gert er ráð fyrir að kerfið verði tilbúið til notkunar í lok nóvember þannig að foreldrar geti notfært sér rafræna skráningu fyrir vorönnina. Jafnframt var ákveðið að boðið verði upp á sömu rafrænu þjónustu í Hveragerði og Ölfusi þegar boðið verður upp á skólamáltíðir þar á komandi skólaári.

Fyrsta Skrifstofuhótel á Íslandi tekur til starfa á Selfossi fimmtudaginn 24 febrúar. Um er að ræða fyrsta hótelið af þremur sem ætlunin er að opna á Árborgarsvæðinu innan vébanda verkefnisins Sunnan3 - rafrænt samfélag.

Skrifstofuhótelið er samvinnuverkefni Sunnan3 - rafræns samfélags, Verkfræðistofu Suðurlands og Tölvu- og radíóþjónustu Suðurlands (TRS). Skrifstofuhótelið verður staðsett í húsnæði Verkfræðistofu Suðurlands á annari hæð í 'Kjarnanum' Austurvegi 3-5 á Selfossi og þar verður opnunarathöfnin haldin.

Markmiðið með uppbyggingu Skrifstofuhótels er að koma til móts við þarfir íbúa sem starfa á höfuðborgarsvæðinu, en vilja og hafa tök á því að vinna hluta vinnutíma síns í heimabyggð. Um er að ræða fullkomna skrifstofuaðstöðu með öflugu háhraðasambandi og hvetjandi vinnuumhverfi. Kostir skrifstofuhótles eru augljósir fyrir starfsfólk sem þarf að sækja vinnu fjarri heimabyggð. Hér er einnig um að ræða möguleika á hagræðingu fyrir vinnuveitendur í lækkun skrifstofukostnaðar. Að auki getur skrifstofuhótel haft jákvæð samfélagsleg áhrif þar sem það getur dregið úr umferð í tengslum við atvinnusókn, mengun og slysahættu.

Árni Magnússon félagsmálaráðherra mun opna Skrifstofuhótelið með formlegum hætti. Árni er búsettur í Hveragerði og telst því vera í markhópi þeirra sem geta nýtt sér Skrifstofuhótel, enda hefur hann sótt vinnu til höfuðborgarsvæðisins á undanförnum árum. Að auki munu talsmenn Sunnan3 verkefnisins og rekstraraðilar Skrifstofuhótelsins flytja ávörp og kynna hugmyndafræðina á bak við skrifstofuhótelið og Sunnan3 verkefnið almennt.

Frekari upplýsingar er að finna á: www.sunnan3.is eða hjá verkefnisstjóra Sunnan3, í síma 6931533, netfang: siggi@sunnan3.is

Rafrænt þjónustutorg fyrir íbúa Árborgar, Hveragerðis og Ölfus var opnað í dag. Með rafrænu þjónustutorgi eignast íbúar sína eigin vefsíðu hjá sveitarfélaginu. Mjög einfalt er að sækja um notendanafn og lykilorð, og til þess að tryggja fullkomið öryggi fá íbúar lykilorðin send í netbankann sinn. Þeir sem ekki hafa aðgang að netbanka fá upplýsingarnar sendar með bréfi. Á þjónustutorginu geta íbúar kannað stöðu fjármála og haldið utan um sín samskipti við sveitarfélagið, séð nýjustu skilaboð og spjallað beint við ákveðna starfsmenn. Einnig hafa þeir beinan aðgang að atburðadagatali, veðrinu, fjölmiðlum og annarri gagnlegri þjónustu.
Nú geta íbúar sent inn umsóknir með gagnvirkum hætti beint af þjónustutorginu. Allur ferill og afgreiðsla umsóknarinnar er sjálfvirkur sem sparar tíma við innslátt, vinnslu og flýtir fyrir ákvarðanatöku. Til að byrja með verður hægt að senda inn umsóknir um grunnskóla, frístundarheimili, skólamáltíðir, og leikskóla
Hér er um að ræða tímamót í rafrænum samskiptum sveitarfélaga og íbúa. Það sem greinir þetta þjónustutorg frá sambærilegum kerfum er að þarfir íbúanna eru settar í forgang og þeir fá þannig fullkomið sjálfsafgreiðslukerfi í hendurnar.